A pesar da crecente presenza das mulleres no alumnado universitario, a súa distribución é desigual entre as distintas titulacións. En particular, na Universidade de Santiago de Compostela os datos do último diagnóstico de igualdade amosan que no curso 2019-20 as alumnas son un 62,83% do total do alumnado de titulacións de grao. Pero persisten as fendas, xa que os porcentaxes de alumnas son: 31,22% na área de enxeñaría, 22,73% no dobre Grao en Matemáticas e en Física, 20% no Grao de Robótica e 13,17 % no Grao en Enxeñería Informática.

Esta escasa presenza de mulleres nalgunhas titulacións do ámbito CTEM (Ciencia, Tecnoloxía, Enxeñaría e Matemáticas) no só prexudica ás mulleres, reducindo ás súas oportunidades de traballo e de participación nos avances e decisións do futuro tecnolóxico, senón que afecta os resultados das investigacións, a innovación e polo tanto á sociedade.

As causas desta desigualdade son múltiples, entre elas a presenza de estereotipos de xénero e a falla de referentes femininos en ciencia e tecnoloxía. Por iso, a nosa universidade inclúe entre os obxectivos das políticas de igualdade incentivar a elección de titulacións non baseadas en roles tradicionais de xénero, centrándose na educación primaria. Esta fenda de xénero xa está aberta en secundaria, como sinalan diversos estudios, polo que é necesario promover programas dirixidos ao alumnado en idades máis temperás. Neste contexto, a Oficina de Igualdade de Xénero, dirixida por Eva Aguayo Lorenzo, iniciou no 2016 o programa Unha enxeñeira ou científica en cada cole, no marco de colaboración do Concello de Santiago de Compostela coa USC.